Askorendako ohitura da udako oporrek eskaintzen duten lasaitasunean liburu bat irakurtzea. Debagoieneko udal liburutegiek ohitura hori indartzen dihardute aspalditik, Biblioporrak deritzon gida herritarren eskura jarrita. Literatura, musika eta zinema gomendio onenak jasotzen ditu gidak, eta gomendio horiek adin eta gustu guztiak hartzen dituzte kontutan.
Hala, liburu, disko eta film interesgarrienak jasotzen dituen gida eskuragarri dago Arrasateko udal bibliotekan.
Adin eta gustu guztiendako
Esan moduan haur, gazte eta helduendako gomendioak biltzen dira liburuxkan, gustu guztiak asetzeko modukoak. Literaturak hartzen du gidako zatirik handiena. Liburuak bost multzotan banatzen dira, adina irizpide moduan hartuta: jaioberriak, 6 urte, 9 urte, gazteak eta helduak. Guztira 80 liburu gomendatzen dira.
Azken urteetan hartutako ohiturari jarraituz, aurten ere disko eta filmak gomendatzen dira, estilo askotariko zortzi disko eta ezagunak zein ezezagunak diren zortzi pelikula.