Etxean jokatu zuten hirurek, baina Mojategi kirol gunean elkartutako zaleen berotasuna ez zuten nahikoa izan behar beste entsegu egin eta irabazteko.
Denboraldiko bigarren jardunaldian Mungiaren aurka jokatu zuten emakumeek, eta entsegurik egin barik jarraitzen dute (0-47). Argi dago oso denboraldi gogorra dutela aurrez aurre, eta denbora beharko dutela entseguak egiten hasi eta emaitza txukunak lortzeko.
Senior mailako mutilek, ostera, ezin izan zuten Bera Bera mendean hartu. Galtzen joan ziren 7-10 eta 7-15, eta azken minutuan entsegua egitea lortu arren berandu zen partiduari buelta emateko (14-15). Burumakur joan ziren jokalari arrasatearrak aldagelara erreakzionatu zutenerako beranduegi zelako.
Eta beteranoek ere ezin izan zuten irabazi. Lapurditik etorritako taldea goiko mailetan ibilitakoa da, eta agerian utzi zuen hori zapatuan. Egindako zortzi entseguak ezin izan zituzten berdindu arrasatearrek.