Kontua da Eroski Uribe auzotik Musakolara joan zenean autobusa ipini zuela, herriko bezeroei bidea errazteko.
Gero, berriz, Arrasateko Udalak urbanoa ipini zuenean, erabaki zuen egokiagoa eta eraginkorragoa izango zela bi erakundeek elkarlanean antolatzea autobus zerbitzu bakarra, biei zerbitzu emango ziena. Hala egin zuten, eta harrezkero, Eroskik dirulaguntza ematen dio Udalari zerbitzu horren truke.
Bada, orain, autobus urbanoaren kontratua aldatu dela-eta, bien arteko hitzarmena berritu egin gura dute, eta horixe da gaurko batzarrean landuko duten puntuetako bat.
Dirulaguntzak eta beste
Horrekin batera, baina, bestelako gai batzuk ere mahai gainean izango dituzte udal agintariek gaurko batzarrean. Besteak beste, AED elkarteak eta Dirty Brothers eta Never Surrender musika taldeek egindako dirulaguntza eskaerak; Sexologia Zerbitzuak aurkeztu duen urritik abendura bitarteko egitaraua eta ur sarea kontrolatzeko sistemaren auditoria lanak eta sistema hori egiaztatzeko lanak.