Oraingo astean onartu du gobernu batzarrak Erlojuaren eraikina (Saiolan) berritzeko proiektua idazteko baldintzen plegua. Horrek esan gura du, dei hori Gipuzkoako buletinean argitaratu ostean proiektuak aurkezten has daitezkeela interesdunak. 15 eguneko epea dute horretarako. 87.876,37 euroko aurrekontua zehaztu dute. Eskaintza guztien artean, bat aukeratuko du Udalak. Gero, obrak adjudikatu egin beharko ditu.
Erlojuaren eraikina goitik behera berritu gura du Udalak eta erabilera berrietarako egokitu. Besteak beste, eraikin haren beheko solairuan Museo Industriala sortzeko asmoa dute; erdiko solairuan, berriz, herriko hainbat talderendako gelak egokituko dituzte, bestelakoen artean, dantza taldeendako. Eta goiko solairua Arrasate Musikalendako izango da.