Esandako moduan, zapatuan izango da Piztu Eguna. 16:30etik aurrera, gaztetxoek ez dute aspertzeko astirik izango Biteri plazan: balance zirkuitua, txalaparta tailerra, bitxigintza, hankapaloak, irrati tailerra, plantilla ikastaroa... Plantilla ikastarorako etxetik ekarri beharko da kamiseta edo serigrafiatu gura den objektua.
Erritmoa eramaten ikasi
Hori guztia gutxi balitz, 18:30ak aldera perkusio tailerra egingo dute. Izan ere, Senegalgo jatorria duen Kataia taldeak ikuskizun parte-hartzaile bat egingo du Biteri plazan. Lander Juaristi Txatxilipurdiko koordinatzaileak aurreratu duenez, Gazte Txoko ezberdinetatik danbor eta bestelako materiala hartuko dute eta animatzen denak erritmoa eramaten ikasteko aukera izango du; hastapen ikastaro batez gozatzeko aukera izango dute, goi mailako irakasleen eskutik. Entretenitzeko eta, gainera, ikasteko aukera paregabea izango da, beraz.