Eta postuetan, denetarik ikusi, erosi edo dastatzeko aukera: txokolateak, eztiak, gaztak, bitxiak, zilarrarekin egindako gauzak, narruarekin egindakoak… Ia saltzaile guztiak izango dira Euskal Herrikoak eta Arrasateko batzuk ere izango dira.
Eta Arrasatekoak saltzen ibiltzeaz gainera, aurten herriko hainbat elkartek ere parte hartuko dute Erdi Aroko azoka borobiltzen. Adibidez, iaz moduan, Doke antzerki taldeak Ezkontza lana antzeztuko du, Arrasateko Trikitilari Taldekoek ere jardungo dute giroa alaitzen, Txatxilipurdikoak ere ibiliko dira bueltan-bueltan eta AEDkoek, berriz, iragarri dute Arrasateko erdigunean egin zuten ibilaldi historiko gidatua errepikatu egingo dutela asteburu horretan.
Hori guztia, gainera, Erdi Aroko bandera eta ikurrekin dekoratutako kaleetan egingo dute, iaz moduan, aurten ere jantziko dituzte-eta Arrasateko kaleak halako elementu dekoratiboekin.
Erdi Aroko azoka antolatzeaz Arrasateko Udala arduratu da, Naparbideak kooperatiba nafarraren laguntzarekin. Horren harira, esan beharra dago ekitaldi horren datak aldatu egin dituztela. Izan ere, hasieran iragarri zuten maiatzaren 24 eta 25ean egingo zutela aurtengo azoka, baina Naparbideak kooperatibak data horiek hartuta zituela-eta erabaki dute aurreratu eta maiatzaren 10 eta 11n egitea.