Gidaren zabalkundeaz hasteko ikastaro bi antolatu dituzte. Lehena estresaren gainekoa izango da. Hasieran urtarril erdialdean egin behar bazuten ere, otsail hasierara atzeratu da ikastaroa. Lau saio egingo dituzte: hilaren 1, 3, 8 eta 10ean. Ekineko kide Maite Uribarrenek aditzera eman duenez, ikastaroak alde teorikoa eta praktikoa izango ditu. Hala, talde txikitan banatuta, norberaren esperientziak hartuko dira aintzat, horrela Arantzazu Loidi adituarekin estresa gainditu edo txikitzeko estrategiak ikasteko.
Bigarren ikastaroan sexualitatea eta komunikazioa landuko dute bi tailer ezberdinetan. Batetik, komunikabideen bitartez jasotzen ditugun mezuak aztertuko dituzte, eta bestetik, bizitza erotikoa alaitzeko proiektu pertsonala nola garatu zehazten saiatuko dira. Nerea Sanchez arrasatearrak bideratuko ditu tailerrak.
Bi ikastaroak talde txikitan emango dira, Uribarrenek dioenez, “gertukoagoak eta samurragoak” dira-eta. Hala, hamar lagun inguruko taldeak osatuko dituzte. Izenematea zabalik egongo da urtarrileko azken astera arte.
Euskara bereizgarri
Ekinek atera berri duen osasun gidaren zeinu bereizgarria euskara izango da. Izan ere, elkarteak uste du emakumeen bizi kalitateari eta osasunari buruzko informazioa euskaraz lortzeko "hutsuneak" daudela.