Izan ere, kale horretan lokal ugari daude, bizilagunek garaje moduan erabiltzen dituztenak. Bada, Udalaren asmoa da lokal horietarako pasabidea ahalbidetzea, baina ez besterik.
Hori horrela, obren bitartez egin behar dutena da kalea egokitu, erabilera berrirako. Hala, gorri koloreko espaloi zabala sortuko dute eta zuhaitz ilara ipini. Jarlekuak ere ipiniko dituzte eta gaur egun dauden berdegunetxo biak egokitu. Horrekin batera, bidea ere egingo dute, esandako moduan, lokaletarako sartu-irtena ahalbidetzeko. Baina bide horretan ere, oinezkoek izango dute lehentasuna.
Obra Sailetik azpimarratu gura izan dute, Elizalde kalean oinezkoek indarra hartzen badute, Gernika Zumardiak jarraipena izango duela Erguin auzotik Uribarriko urbanizazio berrira eta handik Garaia Berrikuntza Guneko pasealekuraino joan ahal izango dutela oinezkoek.
Egokitzapen obrekin batera, azpiegitura batzuk ere berrituko dituzte Elizalden: ur-zikinak batzeko kolektorea, euri-urena eta argiteria.
CIG enpresa dabil obrak egiten eta ia 400.000 euroko aurrekontua dute. Esandako moduan, eta ezustekorik ezean, datorren urteko otsailerako bukatuko dituzte.