Enpresaren ondasun guztiak desagertzen ari direla adierazi dute sindikatutik eta egun lantokia dagoen tokian Udalak etxeak egiteko asmoa duela, gaineratu. Enpresaren etorkizuna bermatuko duen plan industriala abian jartzea eskatzen dute, eta lantegiarentzako beste kokaleku bat aurreikustea, Arrasaten bertan edo inguruan. Hori da, euren hitzetan, lanpostuak ziurtatzeko modu bakarra.
Enpresaren ikuspuntua, oso bestelakoa
Enpresatik aditzera eman dutenez, ELAk dioena ez dator bat errealitatearekin, eta gaineratu dute aski dela udaletxera joatea, enpresa dagoen lurzorua industria-eremu moduan kalifikatua dagoela egiaztatzeko.
Zuzendaritza berriak dio, 2007an enpresa gidatzeari ekin zionetik, hainbat aurrerapauso eman dituztela: "Bezero bakar bat izatetik 20 baino gehiago izatera pasa gara, salmentak igo eta 2008 urtea irabaziekin itxi dugu; 2007an baino 18 langile gehiago ditugu –48– eta, 2009an, hamar gehiago izatea da asmoa; eta inbertsio berriak egin ditugu. Enpresa indartzen ari gara".