Arrasateko plazan egin dute hitzordua goizeko 11etan, ELAk deituta. Lehen Utillajes Uribesalgo zen Moldcam enpresako hainbat langile batu dira han.
Enpresaren ondasun guztiak desagertzen ari direla adierazi dute ELA sindikatutik eta egun lantokia dagoen tokian Udalak etxeak egiteko asmoa duela, gaineratu dute.
Plan industriala eskatu dute
Enpresaren etorkizuna bermatuko duen plan industriala abian jartzea eskatzen dute, eta lantegiarentzako beste kokaleku bat aurreikustea, Arrasaten bertan edo inguruan. Hori da, euren hitzetan, 45 lanpostuak ziurtatzeko modu bakarra.
Zuzendaritzak gezurtatu egin du salaketa
Enpresako arduradunekin harremanetan jarrita, diote ELAk dioena ez datorrela bat errealitatearekin, eta gaineratu dute aski dela udaletxera joatea, enpresa dagoen lurzorua industria-eremu moduan kalifikatua dagoela egiaztatzeko.