Duda barik, zentsura mozioaz gainera, Carrascoren kontrako atentatuaren bestelako ondorioak izango dira batzarreko protagonistetako bat. Izan ere, landuko dituzten gaien artean, atentatu horrek Udal gobernuan eragindako apurketaren ondorengo kargu aldaketekin lotutako bi puntu aztertuko dituzte: EB-Zutik koalizioko zinegotziek karguak utzi eta gero, orain Eusko Abertzale Ekintzako zinegotzien artean banatuko dituzte-eta.
Horien artean, Tokiko Gobernu Batzarreko kideen izendapenak aldatuko dituzte, alkateordeenak, batzorde informatzaileetako lehendakaritzenak eta besteak beste, Iturbide Egoitzaren lehendakaritzarena. Horrez gainera, Ongizate Sailaren ardura Yolanda Perez de Arenazak hartuko du; Garapen Estrategikoarena, Izadi Mondragonek. Kultura eta Jaien Sailarekin, berriz, Oihana Aranburu arduratuko da eta herritarren parte-hartzearen gaineko ardura Harkaitz Biainek izango du.
Horrekin batera, orain arte liberatuta jardun duen Ander Rodriguez EB-Zutik koalizioko zinegotziak uko egingo dio erabateko dedikazio horri.
Eguzki energia eta San Josepe harrobia
Hortik aurrera, eta ezustekorik ez bada, eguneroko jardunarekin lotutako puntuak aztertzea proposatuko diote udalbatzarrari. Adibidez, Arrasaten eguzki energia kaptatzeko sistemak jartzea arautzen duen udal ordenantza behin betiko onartzea aztertuko du. Eta baita ere, San Josepeko harrobiak utzi duen hutsunearen etorkizuneko diseinua egiteko ideien lehiaketa arautu behar duten arauak onartzea aztertuko du.
Esandako moduan, batzarra eguenean izango da. Hitzordua da 19:00etan. Osoko bilkura publikoa denez, edozein herritarrendako daude ateak zabalik.