Erabaki honen inguruan adierazpenak egiten lehena Ezker Batua-Zutik udal taldea izan da. Pozik agertu dira Hirigintza batzordearen erabakiaz, baina Zabaletako proiektuan atzematen ziren irregulartasunak ikusita, proiektua atzera botatzeko bi urte behar izana salatu zuten. Eta "are gehiago", diote, "irregulartasun hauek Ibai Arte merkataritza elkartearen eta alderdi ezkertiarren aldetik planteatu zirenean".
Eroskiren handitzea, berdin
Ezker Batuak-Zutik koalizioak Eroski hipermerkatuaren zabaltzearen proiektuarentzat erabaki berbera hartu dezaten eskatu du. Hauen ustez, Kaskonategi deritzon proiektu honek Zabaleta proiektua bezain legez kanpokoa da. "Ez du zentzurik Zabaleta planak tokiko lurralde plana betetzen ez duela esatea, eta gero Kaskonategi proiektua onartzea, ondoan kokatua eta 13 000 metro koadroko muga gainditzen duen sabaia izango duena" adierazi zuten. Azkenik, "eremu publikoen pribatizazioa ekiditeko eta herriaren bilakaera orekatu eta harmonikoa lortzeko egokiena bi proiektu hauek alboratzea da" gaineratu zuten Ezker Batua-Zutikekoek.