Eusko Alkartasuneko Esther Larrañagak uste du ezinbestekoa dela Madrilen egotea eta Epeleko ur hondakinen araztegia jarri du adibide gisa. "Uste dugu adibide argia dela ikusteko Madrilgo gobernuak euskaldunak nola tratatzen dituen", adierazi du Larrañagak. "Dagozkien ekimenak eta betebeharrak ez dituzte betetzen edo oso berandu betetzen dituzte. Hori agerian jartzera etorri gara. Eta ez da bakarrik uraren kasuan gertatzen. Edozein politikari begiratuz tratamendu berbera jasotzen dugu. Berdin dio alderdi popularra gobernuan egon edo alderdi sozialista".
Debagoieneko hautagaiak
Larrañagak Debagoieneko EAren hautagaiak aurkeztu ditu. Amaia Larrañaga, Pello Urizar, Pedro Mendieta, Lore Martinez eta Juan Carlos Bengoa, hain zuzen ere. Esan du EAk euskal herriaren izaera eta erabakitzeko eskubidea defenditu dituela Madrilen.
"Behar beharrezkoa da Madrilen abertzaleen ahotsa egotea, ezkerraren ahotsa egotea. EAk ozenki aldarrikatuko du Madrilen euskal herriaren izaera. Bereziki, bakea, independentzia, giza eskubideak eta berdintasuna", esan du Larrañagak. "Madrilen egon behar dugu. Alde batetik gizarte eta ingurumen politika garatzeko, gugan eragina dutelako. Eta beste aldetik herri honek duen erabakitzeko eskubidea aldarrikatzeko. EAko hautagaia den Nekane Artzelaik egunero jarriko du agenda politikoan herri honek duen erabakitzeko eskubidea".