Hori horrela, eta alderdi sozialistak aurkeztu gura duen zentsura mozioak aurrera egiten ez duen bitartean, Arrasateko udal gobernua Eusko Abertzale Ekintzaren esku geratuko da.
Aste Santu aurretik alderdi politiko horrek adierazi zuen moduan, beraz, “Arrasateko Udaletxean hartuak dituzten erantzukizun guztiei aurre egiten" jarraitzeko asmoa dute, minorian bada ere.
Izan ere, Arrasateko udalbatzarrak 21 zinegotzik osatzen dute eta Eusko Abertzale Ekintzak maiatzeko hauteskundeetan zazpi jarleku eskuratu zituen. Hala adierazi du Ino Galparsoro alkateak:“Lehen 10 boto genituen eta orain 7 bakarrik. Beraz, EAEko zazpiok bakarrik eraman beharko ditugu batzordeak. Hala ere, horrek ez du esan nahi gure lan estiloa aldatuko dugunik Lehen ere planteamendua zen ahalik eta adostasun handiena lortzea gaien inguruan eta guk saiakera berarekin jarraituko dugu”.
Alkateak gaineratu du aurtengo jardunerako sikiera, udal aurrekontua onartuta dagoela eta horrek “arnasa” emango duela “udal funtzionamendurako”. Eta adierazi du baita ere, EAEk udal gobernua hartu zuenean baino egoera hobea” dela oraingo hau, nahiz eta ez den eurek gurako luketen funtzionamendua.