Aurreikusitako ordutegiak betetzea lortu dute, eta txapelketan lehen aldiz parte hartu duen Doble cero taldeak irabazi du. Finala borrokatua izan da, oso intentsua.
Neska bat txapelketan
Antolatzaileek kalkulatzen dute 20 taldetan banatuta 200-230 lagun inguruk jokatu dutela aurten Zaldibarko 24 orduko txapelketan. Guztiak mutilak, eta denen artean emakume bat; Ane Herrero. Basati taberna taldearekin jokatu du Anek eta gola ere sartu du. Jakin dugu min hartuta amaitu duela txapelketa, baina saria ere jaso du. Hainbeste mutilen artean jokatzeko ausardia erakutsi izanagatik, jokalari onenaren saria jaso du.
Lekuz kanpoko jarrerak
Txapelketaren aurtengo edizioak emandakoarekin gustura azaldu dira antolatzaileak. "Iaz baino lau talde gehiago izan dira txapelketan, eta esango nuke inoiz baino jende gehiago egon dela norgehiagokak ikusten", adierazi du antolatzaileen taldekoa den Gorka Bergaretxek. "Joko maila ere oso altua izan da. Nabaritu egiten da futbolean aritzen den jendea, federatuak daudenak. Oporretan daude eta Zaldibarren jokatzen dute. Fisiko oso ona dute". Puntu ilun bakarra izan du aurtengo edizioak antolatzaileen esanetan. "Azken zortzireneko bi partidutan tentsio une oso gogorrak egon dira". Ez da ezer larririk gertatuta, baina herri mailako txapelketan batean jarrera horiek lekuz kanpokoak direla uste dute antolatzaileek.
Emaitza guztiak eta informazio zabalagoa ASTELEHENEKO GOIENKARIA-n.