Herriko talde eta elkarteei Udalak urtero ematen dien dirulaguntza eskatzeko deialdia da gaur arratsaldean mahai gainean izango dutena. Onartzen badute, dirulaguntza horiek eskatzeko epeak zehaztuko dituzte oraingo astean bertan.
Diru kontuez gainera, obra kontuak ere izango dira gaurko batzarreko protagonista. Batetik herrian apurtuta dauden markesinak konpontzeko lanen adjudikazioa izango dute aztergai gobernuko kideek.
Agerre eta Musakola
Bestetik, Agerre kaleko hiru ataritako bizilagunek aurkeztutako idatzia ere izango dute aztergai. Hain justu ere, bizilagunek eskatzen diote Udalari arrapala egiteko, euren atarteetara iristeko bidea hobetzeko eta hainbat zuhaitz kentzeko.
Eta beste obra bat aipatzearren, Arrasate Herri Eskolak Musakolan daukan ikastetxearen lehen solairua berritzeko obrak adjudikatzeko puntua ere aztertuko dute gaurko batzarrean.