Errepideko animalia. Halaxe deskribatu izan du bere burua Dayna Kurtz musikari amerikarrak. Izan ere, 90eko hamarkada osoa egin zuen AEBetako areto txikietan barrena, ezezaguna zen ikusleen aurrean. Jazz, country edo folkaren izar handien antzera. Eta izar horien antzera, ezagutzera eman denean, arrakasta aurkitu du. Erabateko arrakasta. Kurtzen ahotsa eta haren gitarra jotzeko era ez dira gutxiagorako.
Bada, Dayna Kurtz Arrasateko Amaia antzokian izango da domekan (19:30), haren azken lana aurkezteko: American Standard. 2006an kaleratu zuen Another Black Feather diskoaren jarraipena da azken disko hori. Duela 20 urte inguru murgildu zen musikaren errepidean eta urteotan hainbat lan kaleratu ditu. Lehen urteetan ateratako gehienak kasetean atera zituen kontzertuetan saltzeko, merkeagoak baitziren. Hala ere, aurrez aipatutakoez gain, Postcards From Downtown da lanik aipagarriena, lan hurak ezagutarazi baitzuen harribitxia.
Ahots sarkorra eta hunkigarria
Kurtzen ahotsak hunkitu egingo du ikuslea; ahots sarkorra, berezia du Kurtzek, erregistro anitzekoa. Finean, haren ahotsa jazzaren, folkaren edo soularen izar handienekin konparagarria da, erabat. Agertokian gitarra du lagun, baina dioenez, "abestu zein gitarra jo, biak ditut gustuko; baina gutxiago pentsatu behar izaten dut abesteko".
Blue Mountain taldearen babesa izango du Kurtzek
Dayna Kurtzek goi mailako taldea izango du atzean; Blue Mountain taldea, hain zuzen. 1991n sortua, esperientzia handiko taldea da. Alt-countryaren –country alternatiboaren– talde aitzindarietako bat, 2007an itzuli ziren agertokietara zenbait urtez geldi egon ostean. Sarrerei dagokienez, www.kutxa.net bidez erosi behar dira, 10 eurotan bakoitza. Kontzertuak izugarri merezi du, baina gure artean Kurtz ez da oso ezaguna. Hortaz, ez dago sarrerak agortzeko arriskurik.