Zergak ez izoztea proposatzearen arrazoia da Udalak berak ere dirua behar duela herriaren eta erakundearen funtzionamendurako; besteak beste, inbertsioak egin ahal izateko eta zorrei aurre egin ahal izateko. Jakinekoa da-eta, 2009-2010 jardunerako aurreikusita zeuden proiektu asko ezin izan dituztela gauzatu Udaleko diruak bestelako beharretarako erabili dituztelako; larri dabiltzan herritarrendako, adibidez.
Hori horrela, esandako moduan, zergen igoera orokorra %2 izatea proposatuko du Ogasun batzordeak, baina salbuespenak ere izango dira igoera orokor horretan. Horietako bat da ura %3,5 igoko dutela, Uren Kontsorzioak berak igoera hori aplikatuko duelako.
Salbuespenak: ura, kiroldegia eta ondasun higiezinak
Beste salbuespen bat kiroldegiarena da. Kasu horretan, eta argindarraren eta BEZaren igoerak baldintzatuta, %3,8ko igoera izango dute kiroldegiko prezio orokorrek.
Kiroldegiko prezio igoeraren barruan, baina, izango da baita ere salbuespenik, sarrera orokorra, helduei dagokiena jaitsi egingo dute-eta: gaur egun 6,10 euro ordaindu behar da; bada, datorren urtean 5 euro pasa ordaindu beharko dute.
Eta salbuespen modura kontsidera daiteke, baita ere, ondasun higiezinen gaineko zerga. Izan ere, hor ere %2ko igoera aplikatuko duten arren, igoera hori ez da erreala izango, etxeen edo eraikinen prezioen azken urteotako balio-galeraren eraginez.
Osokoak onartu behar
Edozelan ere, zergen gainekoa proposamena besterik ez da; egueneko osoko bilkurak eman beharko dio behin betiko onespena. Momentuz, PP abstenitu egin zen Ogasun batzordearen bileran, eta jakiteko dago zela bozkatuko duen eguenean. Eta Alternatiba-Zutik koalizioak, berriz, jakinarazi du eguenean emango duela aditzera zein den bere botoa, Ogasun batzordearen txostena sakon aztertu ostean.