Astelehenean, martxoaren 2an hasiko dira arrasatearren sinadurak batzen, maiatzaren 3ra bitartean. Norbanakoen sinadurez gainera, eragileenak ere batu gura dituzte. Gero, batutako sinadurek babestuta, mozioa aurkeztu gura dute Arrasateko Udaletxean. Hori guztiori, oro har, presoen egoera salatzeko, eta bereziki, Arrasateko hiru presoren egoera salatzeko.
Jon Agirre, 28 urte kartzelan
"Jon Agirren kasua oso argia da: 28 urte kartzelan, gaixotasun larriak ditu eta hala eta guztiz ere ez dute askatzen", azpimarratu du Azkaratek. Salatu du 92. artikulua "behin eta berriro" ukatzen diotela Agirreri eta 2006an zigor osoa beteta izan arren, "beste bost urtez" luzatu diotela zigorra.
Maiatzaren 11n beteko ditu Agirrek 28 urte preso. Egun horretan ekitaldia egingo dutela ere iragarri du Portaloria Topaguneak.
Giltzurrun bakarrarekin
Josu Uribetxeberriaren egoera ere salatuko du Portaloira Topaguneak. Kontatu dute giltzurruneko minbizia izan eta giltzurrunetako bat kendu ostean, bakarrarekin bizi dela orain. "Eguneroko jarraipen medikua behar du, kartzelan jasotzea ezinezkoa dena. 92. artikulua ukatu zaio etengabe".
Gaztañaga, 2018ra arte
Azkenik, Jose Inazio Gaztañagari ere "biziarteko espetxe zigorra ezarri" diotela ere salatuko du Portaloira Topaguneak, 2006an zigor osoa beteta izan arren, 2018. urte arte luzatu diotelako zigorra hari.
Maiatzean, mozioa
Herritarren zein eragileen sinadurak batuta, mozioa aurkeztuko dute Arrasateko Udaletxean; maiatzean egingo dute hori "sakabanaketa bukatu, gaixo larriak askatu, bizi arteko espetxe zigorra indargabetu eta Agirre, Uribe eta Gaztañaga askatzeko eskatzen.