Denetariko lanpostuak egonkortu gura ditu Arrasateko Udalak lan eskaintza publiko horren bitartez: hiru gizarte langile, bi liburuzain laguntzaile, bi udaltzain, administraria, Ingurumen Eskolako irakaslea, ehorzlea, peoia, AUKEAko gerentea, Gizarte Zerbitzuetako Teknikari-burua eta aobretako ikuskatzailea.
Oposizio horietara aurkeztu ahal izateko baldintzak edo oinarri-arauak datorren astean zintzilikatuko dituzte Udalaren webgunean.
Azterketa batzuk uda aurretik
Oposizio lehiaketaren gutxi gorabeherako egutegia honako hauxe izango da: oinarriak webgunean argitaratu eta hilabete ingurura zabalduko dute izenematea. Gero, 20 eguneko epea izango da izena emateko. Oposizioetako azterketei dagokienez, berriz, asmoa da “batzuk behintzat uda aurretik egitea”.
Lanpostu kopuru handia da Udalak bete gura duena, baina horrek ez du esan gura Udalaren lan-taldea handitu egingo denik, emandako xehetasunen arabera, “Udalak erabaki du lan-taldea finkatu egin behar dela eta horrexegatik egingo du deialdi publikoa”.