Zapatuan, urriak 16, Dantzatu edo sutara ekimena egingo dute. Lander Juaristi Txatxilipurdiko dinamizatzaileak azaldu duenez, Kulturatera joaten den gaztetxoak dantza egin beharko du: "Asmoa da Kulturate dantzan jartzea, hurbiltzen diren gaztetxo guztiak dantza egin dezatela. Ezin da ikusle moduan joan", dio.
Gazte txokoetan oso arrakastatsua den Just dance jolasa egingo dute eta bakarka zein taldeka, talde onenari sariak emango dizkiote. Lehiaketa itxura ere izango du, beraz. Horrela, Juaristik dioenez, gaztetxoak ekimenean inplikatzea bilatzen dute antolatzaileek.
Datorren astean, surfa
Bestalde, urtero moduan surf ikastaroa egingo dute. Urriaren 23an joango dira Zarautzera eta bertako surf eskolakoekin batera surfa ezagutzeko aukera izango dute gaztetxoek. Surfa egiteaz gain bertan pasako dute eguna. Irteerarako izena emateko Gazte txokoetan edo Gazte bulegoan eman behar da izena.
Garibaiko geltokian elkartuko dira irteteko, 9:15ean. Prezioa izango da 12 euro.