Plastikozko motortxoak
Motorrero Eguneko antolatzaileen helburua adin guztietako pertsonengana heltzea da. Horregatik, haurrendako ekintzak antolatu dituzte. "Etorkizuneko motorzaleekin" kalejira egingo dute Laubide plazatik. Txikienek plastikozko motortxoak erabiliko dituzte. Umeen artean gozokiak banatuko dituzte.
Bazkalostean ordu eta erdiko ibilaldia egingo dute parte-hartzaileek, eta Laubide plazara heltzen direnean jolasak egingo dituzte. Era berean, musikak lekua izango du motor doinuen artean. Dirty Brothers arrasatearrek zuzenekoa egingo dute. Disko berriko kantuak eskainiko dituzte, besteak beste.
Eguraldiaren zain
Antolatzaileek 200 bat parte-hartzaile espero dituzte biharko, baina zerura begira, eguraldiaren zain daude. "Horrelako kontzentrazioetan, eguraldiak zeresan handia dauka. Astea oso euritsua izan da, baina badirudi bihar ez duela euririk egingo", esan digu antolatzaile taldeko Koldo Atxotegik.
Herritarrak ekitaldietan parte hartzera animatu gura dituzte. "Motorzale izan edo ez, egitarau polita osatu dugu. Motorren erakustaldia ederra izango da, eta Dani Carrillok egingo duen ikuskizuna, sekulakoa. Akrobazia ikaragarriak egingo ditu. Guztiak zaudete gonbidatuta", diote.