EFE agentziak jakinarazitakoaren arabera, iazko hauteskunde orokorretako zerrendan hirugarren ordezko moduan aurkeztu zuten Carmen Atxutegi. Alderdi sozialistak hiru ordezkari atera zituen Kongresurako: Miguel Buen, Elvira Kortajarena eta Ernesto Gasco. Baina, hiruek beste postu batzuk okupatu dituzte denborarekin. Azkena Elvira Kortajarena izan da; Argentinan Eusko Jaurlaritzaren ordezkari izateko izendatu berri dute. Bada, haren lekua hartuko du Madrilen Carmen Atxutegik.
Carmen Atxutegik 54 urte ditu, eta Arrasateko zinegotzi da azken udal hauteskundeen ostean. Horrez gainera, Gipuzkoako Diputazioan dihardu lanean, funtzionario moduan.
Zinegotzi izaten segituko du
Arrasateko alderdi sozialistak jakinarazitakoaren arabera, Carmen Atxutegi Madrilen da dagoeneko, kredentzialak entregatzen. Eta era berean, aditzera eman du Arrasateko zinegotzi izaten jarraituko duela.