Halakoetan ohi denez, Ertzaintza, segurtasun protokoloa aktibatu, eta Arrasatera etorri zen, Obenerrekara, hain justu, Ertzaintzaren esanetan, han elementu susmagarri bat aurkitu zutelako.
Horren aurrean, inguruko kale guztiak itxi egin zituzten eta megafonia bitartez auzotarrei abisatu zieten ez ateratzeko ez leiho eta ezta balkoietara ere.
Beharrezko egiaztapenak egin ostean, ikusi zuten abisua faltsua zela eta gauerdi ingururako bueltatu zen normaltasuna Obenerreka auzora. Ertzaintzak esandakoaren arabera, askotan gertatzen dira halako abisu faltsuak.
Obenerrekako auzotar batek kontatutakoaren arabera, berriz, su itzalgailu bat azaldu zen auzoko kabina batean eta huraxe ikertzen ibili zen Ertzaintza. Atzo gauekoa susto handia izan zela ere gaineratu digu. Zorionez, hortxe geratu zen guztia, susto handi batean.