Joan den astean telebistaz grabatzeko moduko finalerdia jokatu zuten Aitor Mendizabalek eta Ibai Bolinagak. Telebistaz grabatu, eta grabatutakoa gorde, Arrasateko taldeko entrenatzaile Mauri Zubillagaren ustez: "Ikaragarria izan zen. Mendizabalek ikusgarri jokatu zuen, tanto ederrak eginaz. Bolinaga batera eta bestera ibili zen defentsa-lan galanta eginez, eta bere pilotakadek min egin zioten Antzuolakoari. Bolinaga 21-17 aurretik zela Mendizabalek partidua berdintzea lortu zuen, eta 21-21ekoan Bolinagak lurretik eraman zituen bi pilota. Azken kolpean, Mendizabalek txapara bota zuen, eta orduan erotu ziren ikusleak. Jende asko zegoen pilotalekuan, eta txalo artean agurtu zituzten biak, egindako ahalegina eskertuz".
Hala, Bolinagak domekan (11:00) jokatuko du txapelketako finala –22 urtez azpikoen kategorian lehena–, Amezketako Roponen kontra.
Amurrioko txapelketako finalean, alebinak
Bestalde, Ander Murua eta Markel Moron Amurrion izango dira gaur, egubakoitza, Amurrioko torneoko finala jokatzeko (19:00). Debarroko txapelketa barruan, berriz, Elkorobarrutiak eta Gonzalezek Aramaioko pilotarien kontra jokatuko dute asteburuan, eta Murgiondok eta Etxezarretak Bergarakoen kontra.