Bixente Atxa izendatu dute Mondragon Unibertsitatearen Eskola Politeknikoko zuzendari

Orain arte Javier Retegi Albisuak jardun du kargu horretan, baina Fagor Etxetresna Elektrikoak Taldeko industria zuzendari eta I+Geko zuzendari izendatu dute, eta Bixente Atxak ordezkatuko du. Atxa izendatzeko erabakia aho batez hartu dute Unibertsitateko Kontseilu Errektoreko kideek.
41 urte ditu Bixente Atxak, ezkonduta dago eta bi seme-alaba ditu. Elektronikako Ingeniaritza Teknikoko ikasketak egin zituen Mondragon Unibertsitatearen Goi Eskola Politeknikoan, eta Goi Ingeniaritza  Elektronikoa Bartzelonako Lull Unibertsitateko La Salle Ingeniaritza Eskolan. Halaber, Elektronika eta Komunikazioko doktoretza egin zuen, Staffordshire-ko Unibertsitatean, Britainia Handian.

Ingeniaritza Teknikoko ikasketak bukatu ondoren, I+G teknikaria izan zen Ulma Packaging (1987-1988) eta Hamburg-eko (Alemania) Rofin-Sinar Laser GmbH enpresetan. Gero, Britainia Handiko Staffordshire-ko Unibertsitatera joan zen ikertzaile, eta bertan zegoela, Elektronikoa eta Komunikazio doktoretza egin zuen, 1993an.

MUko irakasle

1993a ezkero, Mondragon Unibertsitatearen Goi Eskola Politeknikoko elektronika-departamentuko irakaslea da. Unibertsitatean jorratutako ibilbide profesionalaren ardatzak bi izan dira: irakaskuntza, batetik, eta seinale eta komunikazioen teoriari lotutako teknologia-ikerkuntza eta -berrikuntzako proiektuetako partaidetza. 

Azken 4 urteotan, Mondragon Goi Eskola Politeknikoko Kontseilu Errektoreko eta Mondragon Unibertsitateko Kontseilu Errektoreko kidea izan da. Era berean, Euskal Unibertsitate Sistemaren Kalitatea Ebaluatu eta Egiaztatzeko Agentziaren (UNIQUAL) aditu-batzordeko kidea da.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.