%4ren bueltako igoera izango dute txandaka erabiltzen diren Biteriko aparkalekuen prezioek aurten. Kopurutan begiratuta, 2008an, ordubetez Biterin automobila aparkatzeagatik kobratzen zuten 1,1 euro. 2009an, berriz, kostako da 1,20 euro. "KPI baino apurtxo bat gehiago igo ditugu prezioak, baina kontuan hartu behar da hemengo Udalean onartutako prezioak baino gutxiago gabiltzala kobratzen, prezio horien %40 gutxiago", aditzera eman du Juan Grostiagak, parkingaren arduradunak.
Eibarkoaren erdia
Gorostiagak azpimarratu gura izan du, gainera, datozen urteotan bide beretik segitzeko asmoa dutela: "Prezioa bonifikatzen segituko dugu, jendearendako horren garestia izan ez dadin eta modu horretan, jendea fidelizatzen ahalegintzen jarraituko dugu". Horren gaineko adibide bat ere ipini du: "Gure enpresak, Bikanik, Eibarren beste aparkaleku bat ere kudeatzen du, eta han ordubeteko prezioa da 2,1 euro", Arrasatekoaren ia bikoitza, beraz. Edozelan ere, Bikani enpresako ordezkariak aditzera eman du gustura daudela txandakako aparkalekuek duten erabilerarekin.
285 plaza saldu guran
Hori bai, oso bestelako egoeran daude kontzesioan emateko dituzten aparkalekuak: guztira 445 plaza dituzte eta 285 dituzte saldu barik "Oraindik ere ez gaude ohituta kontzesioaren figura horrekin. Jendeak gura du aparkalekua erosi. Pentsatzen du kontzesioan hartzea dela dirua botatzea, eta ez da horrela", dio Gorostiagak. Kopuruak ipini ditu adibide moduan: "Azken batean, halako plaza batek balio ditu 15.000 euro; azken hilabeteotako beherapenarekin, 13.500 euro. Horrek esan gura du urtean ordaintzen dela 270 euro. Edo bestela esanda, hileko 22 euro kostatzen dela 50 urtean ondo zaindu eta babestutako aparkalekuan automobila uzteko eskubidea izateak. Gainera, gura denean transmititu diezaioke erosleak beste norbaiti kontzesio hori".