Aldaketa horiekin gaur egun dagoen diamante itxurako lotunea eta Deba gaineko zubia kenduko dira; horien ordez 80 metroko diametroa eta bost adar izango dituen biribilgunea eta bi zubi berri egingo dira. Biribilgunean elkartuko dira Arrasateko mendebaldeko saihesbideko (GI-2620) lotura, Arrasatera eta Aretxabaletara GI-3920 errepidetik doazen bi bideadarrak, eta GI-627 errepidearekin lotzeko bi adarrak, bat Eibarko noranzkoan eta bestea Gasteizko noranzkoan.
Ikusi Mendebaldeko saihesbidearen hasiera mapa handiago batean
Mendebaldeko saihesbidea
Saihesbidea Mugarriko zubiaren ondoko biribilgune berrian hasiko da, GI-627 errepidera sartzeko lotunearen parean, Aretxabaleta eta Arrasate arteko mugan. Hasierako zatia mazelaren erdialdean barrena doa industri eraikinak gainditu ondoren, punturik garaiena hondakindegiak egongo diren ibar batzuen ondoan dago, eta, jarraian, beherantz doa tunel batean sartuta.
Olandixon egiten ari den tunela 860 metro luze izango da, % 2,50eko malda izango du bide guztian, eta larrialdi kasuetarako hustubideak izango ditu, 480 metro luze, bai pertsonentzat eta bai ibilgailuentzat. Halaber, segurtasun eta kontroleko beharrezko instalazioak izango ditu. Tunelaren irteeran, saihesbideak Aramaio erreka igarotzen du zubi berri baten gainetik, eta lubetan jarraitzen du egungo GI-2620 errepidearekin bat egin arte, biribilgune berri batean.