Maitena Arana, Zahar Berriko teknikariaren esanetan, azokaren helburu nagusia, Zahar Berrirentzako dirua biltzea da. Bizi dugun krisi egoera dela-eta, aurten oso diru-laguntza urriak izan ditu elkarteak; hori horrela, dirua lortzeko beste bide batzuk bilatu behar izan dituzte, tartean, gaur eta bihar egingo duten azoka.
Azokako salmenta-mahaietan, 100 bat euskarazko liburu izango dira; azokaren beste helburu bat da-eta, euskarazko irakurzaletasuna bultzatzea. Liburu gehienak, gazte edo haurrentzako aproposak direla gaineratu du Zahar-Berriko teknikariak: komikiak, ipuinak eta horrelakoak. Hala ere badira, bertso liburuak eta baita eleberriak ere.
Liburu horiek guztiak, Zahar Berriko kideek, hau da, Berbalagunek zein herritarrek oparitutakoak dira; izan ere, elkarteak azoka egin ahal izateko, aurrez liburu eskaera egin zuen. Aranaren esanetan, ederto erantzun zioten deiari herritarrek.