AEDren 25. urteurrena zeresana ari da ematen oraindik. Euskara elkarte
aitzindariak iaz bete zuen mende laurdena eta urte osoan zehar egin
zituzten hain urtemuga berezia ospatzeko ekitaldiak. Hala ere, iaz
abiarazitako ekimen batek orain eman du fruitua: AEDren 25.
urteurreneko diskoa, hain zuzen.
Hasieran 11 taldek grabatu behar
zuten arren -azken orduko arazoek zenbait talderen parte-hartzea ekidin
dute-, azkenean herriko bederatzi taldek hartu dute parte. Diskoa
atzerapenarekin dator, ekainerako kalean egon behar zuen-eta.
Atzerapenak, baina, ez du eten proiektua. Diskoaren helburua garbia da:
euskara gazteengana musikaren bidez helaraztea. Kalean da salgai
dagoeneko, AEDren egoitza eta Arrasateko zenbait tabernatan. Prezio
sinbolikoa jarri diote diskoari: bost euro.
Askotariko estiloak, euskaraz
Hortaz, AEDren 25. urteurreneko diskoak merezi duen aurkezpen jaia izango du. Esandako moduan, Arrasateko bederatzi musika taldek hartu dute parte proiektuan. Hauexek dira euren musikaz kolaboratu duten Arrasateko taldeak: Gose, The Convicts, Ain_1, Foxy Boxxi, Haitzama, The 5 Twisters, Muskaria, Ozen eta Los Galerna. Talde guztiek euskaraz abestu dute disko horretan eta batzuek, gainera, euskara aukeratu dute gai. Talde batzuek euren kabuz grabatutako abestia sartu dute diskoan eta beste batzuek, berriz, Arrasateko Shot! estudioan grabatu dute kantua.
Ekimenean parte hartzea erabaki duten taldeen artean estilo aniztasuna da nagusi. Eta punka, rocka, surfa ala elektronika izan, guztiek euskaraz abestu dute.