Baserritarren hurrengo hitzordua: Santamasak

Hileko hirugarren zapatuko azokekin bukatu, neguko atsedenaldia hartu, eta Arrasateko hurrengo hitzordu handiarekin bat egiteko prestatuko dira herriko eta inguruko baserritarrak orain: Santamasak.

Martitzena tokatzen da aurten abenduaren 22a, Santamas eguna. Gaurko eguna kontatuta (egubakoitza), 25 egun justu. Ezin bestela izan, eta jai handi hori antolatzen dutenak buru-belarri dabiltza lan eta lan.

Santamas Komisiñuek, adibidez, iragarri du laster ikusiko dugula Santamasetako kartela kaleetan. Besteak beste, horrek esan gura du aukeratuta dutela aurrerantzean Santamasetako marrazkia egingo duen egile berria, Olariagaren ordezkoa. Diote laster jakinaraziko dutela hori.

Berritasunak

Aurreratu dute, baita ere, berritasunak antolatzen dabiltzala,  "zapatuari begira" bereziki. Eta martitzenari berari dagokionez ere iragarri dituzte berritasun gehiago; kasu horretan, herri kirolekin lotutakoak: "Ezohiko kirolariak azalerazteko asmoarekin eta, bide batez, dirua aurrezteko asmoarekin, kirolari gazteak ekarriko ditugu; adibidez, trontzalariak, motozerrarekin figura-egileak, lasto lasterketa eta beste izango dira".

Ekitaldi klasikoak

Bestalde, jakinarazi dute, esaterako, ekitaldi "klasikoak" ere izango direla; txerri-dantza, adibidez: "Eta herri bazkaria ere bai, kiroldegian. Bestalde, ganadua Laubide plazan eta artisauak Jokin Zaitegin ipiniko dira". 

Txerria, enkargatuta

Santamasetako protagonistari dagokionez, berriz, hori ere enkargatuta dute: "Larrea (Araba) baserrian dago txerria, gizentzen. Oraindik ez dugu bataiatu. Hainbat proposamen daude-eta…"

Udala, baserritarrekin

Bestalde, Arrasateko Udala ere badabil bere lana egiten, Santamasei begira; hasita daude, adibidez, baserritarren baiezko batzuk jasotzen, eta iazko kopuru bera etorriko dela uste dute.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.