Jakina denez, Barrenatxo errota tokiz aldatu behar dute. Gaur egun, Garagartzako errepide bazterrean dago eta Diputazioak ez du onartu berezko tokian uztea, errotaren atea errepide ondoan dagoelako eta beraz, irisgarritasun arauak ez direlako betetzen. Horrez gain, orain dagoen lekuan oinezkoendako babesik ez dagoela eta hori bermatzeko aukerarik ez dagoela ere arrazoitu du Diputazioak. Polmetasako eraikin berria egiten dabilen San Andres Berri promotoreak dauka konpontze lanen ardura, Udalak hala aginduta.
Uribarriko auzotarrek irtenbidea aurkitu diote horri. Barrenatxo Garaiara eramatea nahi dute, Gautxori baserria zenaren atzeko berdegune batera.
Mendiazpiko zubia
Barrenatxo errota, bada, ez litzateke bakarrik egongo han. Olandixoko tunelaren eraikuntza lanen eraginez, Uribarriko beste ondare arkitektoniko bat, Mendiazpiko zubia, bota egin beharko dute.
Uribarrikoek proposatu dute esandako zubia Barrenatxo ondoan berreraikitzea. Egitasmo horren aurrekontua zenbatekoa litzatekeen ez dakite oraindik.