Babestutako beste 324 etxebizitza egiteko proiektua abiarazi dute Zerrajeran

Atzo, Arrasaten zegoela aprobetxatuz, Javier Madrazok, Etxebizitza sailburuak udalerrian egin behar dituzten hurrengo egitasmoen berri eman zuen. Hain justu, jakinarazi zuen Arrasaten babestutako beste 324 etxebizitza egiteko proiektua abiarazita dutela dagoeneko; horiek ere Zerrajera inguruan eraikitzekoak (orain eraiki dituzten etxebizitzen atzeko aldean). Madrazok zehaztu zuen Arrasateko Udala badabilela ingurua urbanizatzen eta uztailean bertan esleitu behar duela Visesak proiektua idazteko lanak.


Etxebizitza horiek guztiak alokairuzkoak izango direla azpimarratu zuen sailburuak: 216 izango dira babes ofizialeko alokairdudunak eta gainerako 108ak alokairu sozialekoak. Alokairuen kopuruen gaineko datua ere eman zuen Madrazok: hileko 200-250 euro.

Etxeon proiektua idatzi eta gero, lurren kutsadura garbitu egin beharko dutela gogora ekarri zuen eta horren ostean hasiko direla obrak egiten. Javier Madrazoren esanetan, 2009aren hasieran izango da hori.

Alokairuan hartzeko izango diren 216 etxebizitza horien proiektua lehengo legealditik dator. Orduko udal agintarien asmoa zen Kutxari esleitzea etxeon proiektua, baina hainbat protestaren ondorioz, asmo hori atzera bota zuten eta azkenean Visesari esleitu zizkioten etxeok. 

Bukatzeko, gaineratu zuen Arrasateko Udalak lurzoru gehiago ematen badie etxe gehiago eraikitzeko, eurek badutela horretarako borondatea; gogora ekarri zuen Etxebiden arrasatear ugarik emanda daukala izena.   

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.