Berdindua izan zen oso atzo arratsaldean Ford Mugarrik Bizkaiko Romo taldearen kontra jokatutako partidua. Gogoz irten ziren kantxara bi taldeak, eta arrasatearrak izan ziren lehenengo gola markatu zutenak. Ia lehenengo zati osoan etxekoak markagailuan aurretik joatea lortu zuten, baina gol errentak ez ziren oso handiak izan. Hala, atsedenaldira, 11-8 emaitzarekin joan ziren. Aurretik, baina, arrasatearrek jokalari garrantzitsu bat galdu zuten, Josu Herrerok min hartu zuen-eta.
Romoren defentsa aldaketa
Atsedenaldiaren ostean, jokoa gogortu egin zen. Hasieran behintzat, Ford Mugarrik egoera kontrolpean zuela zirudien, baina ez zuten jakin bizkaitarrek defentsan egindako aldaketei erantzuten. Horren ondorioz, bien arteko aldea murrizten joan zen eta partiduaren bukaera aldera, Romok aurrea hartzea lortu zuen. Azken minutura, 26-27 emaitzarekin heldu ziren eta berdinketaren tantua Aldanondok sartu zuen penaltiz. Asko borrokatuta, baina azkenean puntu bat eskuratzea lortu zuten arrasatearrek.
Epaileekin haserre
Epaileen lanak txistu asko jaso zituen partiduan, eta Edu Orgaz arrasatearren entrenatzailea haserre zegoen neurketa amaieran. ''Argi dago partiduak geuk galtzen edo irabazten ditugula, baina gaurkoan, epaileetako batek akats ugari egin ditu, eta hori ere jakinarazi egin behar da'' adierazi zuen Orgazek.
Atzoko garaipenarekin, Euskadiko Txapelketan lider izaten jarraitzen du Ford Mugarrik. Hurrengo jardunaldian, Corazonistas izango da aurkaria.