Dribling hasi zen irabazten (2-0), baina atzean eskasago egin zituen gero minutu batzuk eta Lasagabasterrek aprobetxatu egin zuen hori parean jartzeko (2-2). Berdinduta zegoen neurketa eta, harmailetan, luzapena jokatu beharko zutela pentsatzen hasita zegoen jendea. Azken minutuan eta penaltiz, Paulaner Driblingek gola egin zuen, ordea, eta orduantxe argitu ziren zalantza guztiak. Aurreko astean Kopako txapela jantzi zuen taldeak Ligakoa jantzi zuen atzo. Denboraldi bikaina egin dute.
2., 3. eta 4. postuak
Driblingen kontra finala galduta, Lasagabasterrek bigarren postuarekin konformatu behar izan du. At. Celaya sailkatu da hirugarren: aurtengo Ligako irabazleari gehien aurre egin ziezaiokeen taldea zen, behar bada, baina finalerdietan Lasagabasterren kontra galdu eta gero, ezin besterik egin. Eta McAwen Dauenek ez du zortea aldeko izan. Liga irabazten hasi bazen ere, bi baja garrantzitsu izan zituen –min hartu zuen jokalari batek eta kanpora joan zen beste bat– eta laugarren geratu dira, azkenean.
Antolatzaileak, pozik
"Txapelketa oso ona izan da; eta amaiera, bikaina". Hitz horiekin laburbildu digu antolakuntza taldeko Ibai Gonzalezek aurtengo Zaldibarko Ligak emandakoa. Astebururo, futbolari eta zale mordoa batzea lortu dute eta helburua bete dute, beraz.