Eguenean, otsailaren 5ean, hasi zituzten Santa Ageda jaietako ospakizunak Gesalibar auzoan. Luncha egin zuten Santa Ageda eguna ospatzeko eta ondoren meza izan zuten auzotarrendako. Barikuan, berriz, bertso afari polita eta arrakastatsua egin zuten Jon Maia eta Sebastian Lizaso bertsolariekin. Guztira, 75 auzotar izan ziren afaltzen. Gesalibarko alkateak Jose Ramon Askasibarrek adierazi digu primeran pasa zutela eta goizaldeko ordu txikiak arte aritu zirela auzotarrak bertsotan.
Zapatuan, goizean, Txatxilipurdik umeendako jolasak antolatu zituen. Ondoren, Gesalibarko abesbatza kantuan ibili zen auzoan barrena giroa berotuz.
Aurtengo sagardo berria dastatzeko aukera ere izan zuten auzotarrek. Zapiain sagardotegiko kupelarekin txotx egitera 100 autotar gerturatu ziren.
Zapatu gauean, afaria egin zuten Gesalibarko elkartean. Auzotar bakoitzak etxetik ekarritakoa jan zuten afaltzeko.
Domekan, berriz, hildako auzotarren omenezko meza egin zuten. Ondoren, Santa Ageda jaiak borobiltzeko luncha egin zuten bertaratutakoek.
Balorazio positiboa
Jose Ramon Askasibar oso pozik azaldu da eta balorazio guztiz positiboa egiten duela esan digu eguraldiak asko lagundu ez arren. "Parte hartzea guztiz azpimarragarria da. Izan ere, Gesalibarren 120 auzotar gara eta ia guztiek hartu dute esku ekintza batean edo bestean aste bukaeran".Askasibarrek Arrasateko Udalaren laguntza azpimarratu nahi izan du. Izan ere, Udalak diruz laguntza "polita" egin duela kontatu digu eta eguraldi kaxkarrari aurre egiteko azpiegitura ere eskaini duela esan du.