Auto kopurua handitu da
Arrasatetik Elorregiko biribilguneraino doan tartea da motelena eta eragozpen gehien sortzen dituena. Zirkulazioa ez da erregulatzen eta urtetik urtera auto kopurua haziz doala begi bistakoa da. Hala baieztatu digute Ertzaintzan. Haiengana jo dugu azalpen eske eta galdetzeko ea eragozpen handi horiek ikusita zirkulazioa arintzeko neurririk hartzea badagoen.
Ertzaintzan bertan gauza jakina da azken urteotan zirkulazioan egondako hazkundea eta onartzen dute Elorregi eta Arrasate arteko tartea euskal errepideetako astunenetakoa dela. Ea erregulatzerik badagoen galdetzerakoan, erantzuna argia da: "Ertzaintzak ez du trafikoa erregulatzeko lanik egiten istripu edo eragozpen larririk ez badago".
Noren ardura?
Autoen dentsitate handiak eragiten du zirkulazioaren moteltzea edo gelditzea eta Ertzaintzatik diote kasu horretan ez dela ezer egiten. Antza, orain dela urte batzuk egiten zen, baina dagoeneko ez da Ertzaintzaren ardura.
Arrasateko eta Bergarako udaltzaingoetara ere jo dugu argibide eske eta haiek ere diote ez dela euren lana. Udaltzaingoan herri barruko trafikoa bakarrik erregulatzeko ardura daukate. Hala esan digute Arrasate eta Bergarako udaltzainek.