Uda denboraldia gogor hasi dute Musakolan, kiroldegiko harreran adierazi dutenez: "Eguraldi ona egin duenez, jende dezente etorri da; iaz ere hala hasi genuen denboraldia".
Bonoak eskuratzeko aukera
Egun baterako sarrera 6'10 euro ordaindu behar dute helduek eta hiru euro 20 urtetik beherakoek.
Baina sarrera merkeago irteten dadin bonoak eskura daitezke: uda osorako bonoak, 58'90 euro helduendako eta 35'10 euro gaztetxoendako. Horrez gain, hamar egunetarako bonoak ere badaude: 47'70 euro eta 23,80 euro. Eta azkenik, uda osorako familia bonoa –guraso eta seme alabendako da bakarrik– 92,25 euro ordaindu beharko da.
Kioskoa, Gureak taldearen ardura
Aurten Gureak taldeak hartu du kioskoaren ardura. Aukeak kioskoaren zerbitzuari beste buelta bat eman gura izan dio, adibidez, pintxo eta ogitartekoak eskainiz. Gureak-eko Tomas Urzelaik ideia ona dela uste du, baina ez du posible ikusten: "Labe txiki batzuk jartzea pentsatu genuen baina kioskoa oso txikia da, bertan ezer gutxi egin daiteke. Garaiako jatetxetik tortilak ekartzea pentsatu genuen baina ez dugu uste merezi duenik". Hala, urterokoa izango da eskaintza, eta goiz eta arratsaldez egongo da zabalik, irailaren 12ra arte.