Bidegorriari berari dagokionez, Epeletik ospitale-gunerainoko bidegorri zatia hasiko da araztegia egiten dabiltzan gune horretan, Eroski ingurutik pasa eta Arrasatera sartu eta ospitalerainoko bidea egingo du erreka ondotik. Gero, ospitale-gunean Arrasate barruko bidegorriarekin bat egingo du. Hain zuzen ere, Zerrajerako atzeko partetik pasatzen den bidegorriarekin. Bidegorri zati hori bi kilometro eta 400 metro luze da.
Hala kontatu du German Pozasek, Diputazioko Garapen Iraunkorreko Saileko teknikariak. Izan ere, Gipuzkoako Diputazioa dabil inguruko bidegorria eraikitzen.
Hegoaldeko zatia
Diputazioko ordezkariak emandako xehetasunen arabera, Arrasate hegoaldeko zatia, berriz, motzagoa izango da. Araba etorbidean hasi eta Fagor San Andresen bukatuko da. 500 metro luze izango da.
Epele-San Prudentzio
Bestalde, jakinarazi du, baita ere, Epeletik San Prudentziorainoko bidegorri zatiari dagokion proiektua idatzita dagoela. Eta momentu honetan proiektu hori gauzatu ahal izateko lurrak eskuratzen dabiltzala. Edozelan ere, ez du datarik zehaztu.