Zirrara, harridura eta enpatia. Horiek izango dira seguru asko egubakoitzean Jon Andueza arrasatearraren Simplemente filma ikusi zuten 700 herritarren sentimenduetan gailendu zirenak. Sentimenduz, naturaltasunez, desiraz, hitzez eta espresio zintzoz betetako istorioa da Simplemente, dantza ikuskizun baten prestaketaren aurreko uneetan gertatzen direnetan oinarrituta, Down sindromea dutenen egunerokora hurbilduko gaituena. Dantza oinarria eta era berean aitzakia da, urritasun mota hori duten pertsonen egunerokoa azaltzeko.
Leioako Despertar los Sentidos taldea protagonista
Dani, Urtzi, Alberto, Saioa, Iñigo eta Ana dira Castro Urdialesko Oriñon hondartzan grabatutako filmaren protagonistak; pertsona burujabeak, egiazaleak, arruntak eta sentimenduz beteak; gainontzeko herritarrak legez maitemindu, deseatu, lagundu, solastu edota negar egiten dutenak. Protagonistak Leioako Despertar los Sentidos dantza taldeko gazteak dira, aktore lanetan lehen aldia bada ere, antzezle esperientziadun moduan lan egiten dutenak. Dantza ikuskizuna prestatzen ematen duten tarte horretan gertatzen direnekin ikuslegoa lagunarte maitagarri horrekin identifikatzea lortzen du Anduezak.
Andueza ere Antzokian
Filmeko protagonistek ez zuten egubakoitzean Amaia Antzokian egoterik izan; ez zuen hutsik egin, baina, Jon Anduezak. Antzokian batu ziren herritarrei eskerrak emanez hasi zituen hitzak, zer esanik ez, filmeko protagonistak eta euren senitartekoak eskertu zituela bereziki. Herritarrek harrera beroa egin zioten bai Anduezari eta baita filmari ere. Hori argi geratu zen filma ikusten ari ginen bitartean ikusleen artean sortu ziren barre algara eta negar malkoekin. Eta zer esanik ez bukaerako txalo zaparradaz; txalo zaparrada amaigabea, ikuslegoari filma benetan gustatu zitzaionaren adierazle.
Umorez, sentimenduz eta gustuz egindako lana da Simplemen