Orain arte Osakidetzak larrialdiren bat izan eta helikopteroa erabili beharra tokatu denean, Eroski ondoko Arruena parkean lur hartu du helikopteroak, eta Arruena okupatuta izan denean, Mojategiko futbol eta errugbi zelaian.
Bada orain, larrialdietarako helikopteroak lur hartzeko behar bezalako gunea egokituko dute Arrasaten. Esandako moduan, Markuleteko industrialdearen eremu bat aukeratu du Osakidetzak horretarako. Besteak beste, kontuan hartu du inguru hartan zein den haizearen eragina.
15.000-20.000 euro arteko aurrekontua izango dute heliportua egokitzeko obrek. Arrasateko Udalak ondo ikusi du Jaurlaritzaren eskaera eta asteleheneko batzarrean erabaki zuen baiezkoa ematea. Beraz, laster egokitzapen lanak egiten hasiko dira eta bukatutakoan, Arrasatek osasun larrialdietarako heliportua ere izango du.