Arrasatearrek ondo jokatu zuten eta garaipena eskura izan zuten; baina, azkenean ezin izan zuten euskal kopako finalerako txartela lortu.
Iturripen garaipena
Egubakoitzean hasi zuten arrasatearrek euskal kopa. Arrasateko Iturripen, ADOS talde gasteiztarraren aurka aritu ziren; etxekoek gogor egin behar izan zuten lana garaipena lortzeko.
Partidua lasai hasi zuten etxekoek; bigarren minutuan lortu zuten lehenengo saskiratzea, Gorka Kintanak, hain zuzen. Etxeko taldeak taula azpian ez zuen lan ona egin; errebotea hartzerakoan makal ibili ziren. Azken laurdenean, baina, arrasatearrak indartuta atera ziren eta markagailuan errenta hartzea lortu zuten. Hala, 97-90 irabazi zuten Iñaki Merinoren mutilek.
Finalerdietan kanpora
Lehenengo norgehiagoka irabazita, EBA ligako Iraurgi azkoitiarren aurka jokatu zuten zapatuan; eta, kantxan nabaritu egin zen taldeen arteko maila ezberdina. Arrasatearrek ondo jokatu zuten eta garaipena eskura izan zuten arren, euskal kopako finala jokatzetik at geratu ziren.