Arrasatear askok bat egin dute udal ordezkari, tabernari, presoen senide eta bestelakoek egindako deialdiari. Hala, 19:15 aldera, manifestazio jendetsu bat irten da Herriko Plazatik udaltzainek gidatuta. Ertzaintzaren hainbat furgoneta zeuden herriko hainbat puntutan kokatuta, baina manifestazioa baimenduta zegoen, eta ez da ezer gertatu.
Manifestazioaren bukaeran, antolatzaileek arrasatearrei eskerrak eman dizkiete 'Utzi bakean Arrasate' eskaerarekin bat egiteagatik; eta Barne Sailaren eta Audientzia Nazionalaren jarrera salatu dute. Horrez gain, elkarrizketaren eta negoziazioaren aldeko eskaera egin dute, eta arrasatearrei bide horretan indarrak batzeko eskatu diete.