Arrasatear gaztea Piriniotatik (Fago) atera dute, zortzi orduko erreskatearekin

Atzo, zapatua, gertatu zen istripua, eguerdi partean, Huescako Fago izeneko sakanean. Komunikazio agentzien arabera, gaztea rappelean zebilela labandu eta adar batetik zintzilik zegoela, urak eraman eta zulo batean geratu zen, irten ezinda eta zaurituta, tibia eta peronearen apurketa posiblearekin eta sorbalda dislokatuta zuela. Zortzi ordu behar izan zituen Guardia Zibilak hura ateratzeko. Huescako San Jorge ospitalera eraman zuten gero.

Rappel egiten zebilela labandu, adar batera jausi eta urak arrastatuta zulo sakon batean bukatu zuen A.E.L. arrasatearrak atzo (zapatua) eguerdian Huescako Fago sakanean. Lagunek ahaleginak egin zituzten laguntzeko, baina ezin, eta Guardia Zibilari deitu behar izan zioten. 

Rappelean eta igerian

Guardia Zibilak bost lagunek eta kamilladun batek osatutako erreskate taldea bidali zuten laguntzera, helikoptero eta guzti. Sakana sakona zen, baina, eta helikopteroak ezin izan zuen iritsi. Nahikoa lanekin lortu zuen erreskate taldeak iristea. Esku-ohean gaztea lotu eta sakana jaitsi egin behar izan zuten handik irteteko.

Rappel egiten, igeri egiten eta tirolinen bitartez lortu zuten azkenean 25 urteko arrasatearra errepide ondora eramatea. Handik helikopteroan eraman zuten, Huescako San Jorge ospitalera. 19:45ean eman zituzten bukatutzat erreskate lanak. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.