Jon Garaik, Kultura Saileko teknikari buruak emandako azalpenen arabera, Monterronek dituen lau solairuetan 23 ikasgela egokitzeko lanak egin beharko dituzte. Lan txikiak izango dira baina eskolak hasi aurretik egin beharrekoak.
Orain, hortaz, lan horiek egiteko proiektua lantzen dabil Udala, baina euren asmoa da guztia ahalik eta lasterren bukatzea, Arrasate Musikaleko ia 600 ikasleek lehenbailehen hasteko.
Printzipioz, behin behinerako neurria da Arrasate Musikalek Monterron jauregian ematea eskolak. Bien bitartean, Aprendizen Eskolaren egoera aztertzen jarraituko dute adituek. Ino Galparsoro alkateak Goienari jakinarazi dionez, oraindik ez dute emaitzarik jaso. Behin emaitzak esku artean, baloratu egin beharko dute zer egin. Izan ere, Aprendizen Eskolaren egoera oso kaskarra bada, ezingo dira hara itzuli.