Atentatuen lekuko izan diren herriez osatutakoa da Memoriaren mapa, eta mapa horretan Arrasate egon dadila eskatu dute alderdi sozialistako kideek, Isaias Carrasco eta ETAk hildako gainerako lagunak oroitzeko.
Gabeziak garbitasunean
Arrietak adierazi du goraipatzekoa dela ETAren aldeko sinbologia kaleetatik kentzeko jaurlaritzaren barne sailak egindako lana, baina oraindik hainbat kartel eta pintada kentzeko daudela gogorarazi du. Eta ez zentzu horretan bakarrik, garbitasunaren zentzu zabalenean Arrasatek dituen gabeziak salatu ditu, eta beste arlo batzuetan auzoek erdigunearekiko jasaten duten tratu desberdina ere bai.
Arrietak eskatu dio udal gobernuari jarri dezala eztabaidagai sozialistek bere garaian proposatutako garbitasunari buruzko ordenantza. Segurtasun, kirol instalazio, aisialdi eta turismo arloetako kudeaketa kaskarra ere salatu du.
Herria garrantzia galtzen
Arrasate bailarako herri garrantzitsuena bezala pisua galtzen ari dela esan du, eta hori, besteak beste, gainerako erakundeekiko harreman ezaren ondorio dela gaineratu.
Azken finean, hauek guztiengatik kaltetuak herritarrak direla azpimarratu du alderdi sozialistak.
