Gaur eguerdian egin dute kamiseta eta logotipo berriaren aurkezpena.Klubaren orain arteko ibilbidean Obelix izan da Arrasateko errugbi taldearen irudi nagusia, baina irudi hori eguneratzeko ordua iritsi dela uste dute.
Indarra eta konpromisoa
Arazoa Obelix ez dela klubaren irudia da; hau da, copyrighta duen irudi bat da, eta sekula arazorik izan ez badute ere, aldatzeko ordua zela erabaki du klubak Ramon Barrutia elkarteko presidentearen berbetan. Hala, errugbiko ordezkariek Arrasateko herensugearen irudia aukeratu dute Obelix ordezkatzeko: Indarra eta konpromisoa erakusten duen irudia dela esan digute.
Irudiaren egilea Aitor Etxebarriarteun aretxabaletarra izan da, eta Iñigo Zabalaren laguntza izan du lana egiteko orduan. "Herensugea gogorra da, errugbia bezala. Bien arteko lotura erakutsi gura izan dugu; gainera, herensugearen atzaparrak erakutsi ditugu. Kolore gorria aukeratu dugu kamiseta morea delako eta kontrastea egiteko", dio Etxebarriarteunek.
Astorek egin du kamiseta
Irudi berriarekin batera Astorek egindako jantziak ere aurkeztu dituzte prentsaurrekoan. Horrekin batera, azken urteotan taldearen babesle izan den eta datozen urteetan ere jarraituko duen Kanpanzar Harrobiaren babesa eskertu gura izan dute errugbiko arduradunek.