Txalotzekoa da Arrasate Dragoi gimnasia taldeko bost neskek lortu dutena; pozik daude Saioa Arriola,
Leire Gonzalez, Leire Poyato, Jone Goikolea, Naiara Zabarte eta Janire
Morales. Urtetan zehar gimnasia erritmikoa egiten ibili ondoren,
2008-2009 denboraldian Euskadiko Aerobik txapelketan parte hartzera
animatu eta sekulako emaitza lortu baitute.
Amestutako debuta
Lehenengoz eman dute izena Aerobik txapelketan, eta Espainiako
txapelketarako txartela eskuratu dute. Maiatzaren 15ean Arrasate utzi
eta Granadara abiatuko da boskotea, eta egun bat beranduago izango dute
proba Espainiako talde onenen artean. Domekan, azkenik, etxerako bidea
hartuko dute. Hots, aste bukaera bakarreko joan etorria.
Gimnasiatik aerobikera
Boskote arrasatearra oso txikitatik aritu da gimnasia erritmikoan. Hala
ere, kirol horretan oso gutxi dira 18 urtetik aurrera gimnasia
erritmikoa egiten jarraitzen dutenak. Hala, gimnasia utzi eta gero,
aerobika egiteko aukera suertatu zitzaien. Edurne Elkoro taldearen
entrenatzaileak jakinarazi duenez, "jarduera fisiko handiko kirola da
aerobika, baina ez ditu gimnasia erritmikoak eskatzen dituen
entrenamendu orduak eskatzen".
Estatu mailako probari dagokionez, Euskadiko txapelketako koreografia
bera egingo dutela jakinarazi du Elkorok. Bi minutuko saioak dira;
kalifikazio onena egiten duenak irabaziko du.
Ez da erraza izango
Elkorok badaki oso zaila egongo dela txapelketako lehen postuetan
amaitzea: "Estatu mailako talde onenak izango dira Granadan eta
Aerobika ezezaguna da hemen Espainiako hainbat lekurekin konparatuz".
Hala ere, arrasatearren helburu nagusia Espainiako Aerobik txapelketa
ezagutzea da.
Gimnasia erritmikoa: Maiatzean ospatuko dituzte maila guztietako finalak
Maiatza hilabete ezin erabakigarriagoa izango da Arrasate Dragoi gimnasia taldearentzat. Izan ere, eskola arteko txapelketako bigarren fasea gainditu ondoren, hilabete horretan izango dituzte maila guztietako Gipuzkoako txapelketako finalak. Maiatza erdialdean izango dituzte Gipuzkoa mailako probak –maiatzaren 16 eta 23ko aste bukaeretan– eta lehen hiru postuetan sartzen diren taldeak Euskadiko txapelketan hartuko dute parte–maiatza amaiera eta ekain hasieran egingo dira–. Heldu da, hortaz, denboraldiko lan guztia neurtzeko unea.