Merkemerkaua izenarekin antolatu dute Udalak eta Ibai-Arte merkatari
elkarteak ekimena, herriko merkatariei laguntzeko. Eta hasieran
ekimenak uste baino erantzun txikiagoa izan bazuen ere, oraingo astean
egoerari buelta eman eta kabitzen direnak baino saltoki gehiagok jo du
Udalera izena ematera.
23 saltoki
Edozelan ere, 23 saltokirendako lekua dago Uarkapen, eta beraz, kopuru horrek parte hartuko du azokan: "Denetariko dendak izango dira: jantzienak, oinetakoenak, ume zein helduendako; kirol dendak, altzarienak...", kontatu du Marga Garmendiak, azoka antolatzen dabilen udal teknikariak.Haiekin batera, Monte taberna ere izango dela gaineratu du teknikariak: "Pintxoak-eta eramango ditu, eta azoka girotuko du, erosketak egiten nekatzen direnendako".
Astebete lehenago kalean
Bestalde, jakinarazi du, baita ere, azoka baino astebete lehenago, Arrasateko alde zaharra "dekoratuko" dutela, Merkemerkatua-ren irudi eta logotipoarekin. "Gabonetako euskarrietan ipiniko ditugu banderatxoak azokaren irudiarekin. Modu horretan iragarriko dugu, kalean badatorrela zerbait desberdina.Irudi horren harira, hark lotura zuzena izango du Arrasaterekin. Debagoieneko Arteman enpresak landu du: "Merkealdian izango direla kontuan hartu dugu, eta hala, irudiak irudikatzen du produktuek -jantziek eta- izaten duten etiketa. Merkemerkaua izenaren hitz jokoa aprobetxatu dugu, eta Arrasateren more kolorea sartu diogu, eta herriaren dragoia ere gehitu diogu. Helburua da jendeak, irudia ikusteaz bat, identifika dezala azoka hori Arrasaterekin", azaldu du Garbiñe Beitiak, logotipoa diseinatu duen Artemaneko kideak.
Parte hartuko duten saltokien zerrenda
| Jarduera | Herria | |
| SUGAR | Nesken arropa | Arrasate |
| MABEL | Arropa eta osagarriak | Arrasate |
| CASA CECIAGA | Lentzeria | Arrasate |
| HAURTXOA | Umeen arropa | Arrasate |
| GARRAXI | Gazteen arropa eta osagarriak | Arrasate |
| MARRUBI | Altzari eta osagarriak | Arrasate |
| KILI KOLO | Arropa eta osagarriak | Arrasate |
| TROKO BOUTIQUE | Emakumezkoen arropa | Arrasate |
| AMETS | Umeen arropa | Arrasate |
| LOS VAQUEROS | Gazteen arropa | Arrasate |
| FORUM ARRASATE | Kirol ekipamendua | Arrasate |
| LAINO | Skate, snow arropa eta osagarriak | Bergara |
| XUXU | Arropa eta osagarriak | Bergara |
| JUNBIJU | Gazteen arropa | Bergara |
| MAIA | Gazteen arropa | Bergara |
| KATIBOS | Umeen oinetakoak | Aretxabaleta |
| HIKA | Osagarriak | Arrasate |
| TOTEM | Arropa eta oinetakoak | Arrasate |
| MARKELIÑE | Umeen arropa eta oinetakoak | Bergara |
| KILIMA | Umeen eta haurdunen arropa | Aretxabaleta |
| OSKARBI | Oinetakoak | Arrasate |
| BEINKE | Arropa eta osagarriak | Arrasate |
| MONTE | Taberna | Arrasate |