Arizmendiko mutilek bide luzea egin dute gaurko finalera sailkatu ahal izateko. Hasteko, Series Colegiales barruan TAU Baskoniak antolatutako txapelketan nagusitu ziren, eta ondoren Zaragozaraino joan ziren –orain dela bi aste–, hango ordezkari Escolapiosen kontra jokatzera (71-72).
Zaragozan final estua jokatu zuten, eta harmailetako zaleak Escolapiosen alde bazeuden ere, presioa gaindituta Amianoren eta Gabilondoren mutilek –Aitor Rebalo, Martxel Balantzategi, Julen Kortabarria, Ander Atxa, Iker Barbero, Gorka Arejolaleiba, Iñigo Merino eta Jon Altube– ipar zonako finalera sailkatzea lortu zuten.
Oraingoan, baina, Arizmendikoek etxeko zaleen aurrean jokatuko dute, izan ere, Arizmendikoen asmoa da gaur Iturripeko harmailak jendez betetzea: "Zaragozan 700 zale izan ziren harmailetan, eta gure asmoa da kopuru hori handitzea. Horretarako, ipar zonako finalaren aurretik LH eta DBH mailetako ikasleendako saskibaloi partiduak antolatuko ditugu, motorrak berotzen joateko", adierazi du taldeko entrenatzaile Urtzi Amianok.
Ointxe!-rekin elkarlanean
Arizmendikoak Madrilerako finalera sailkatzea "sari galanta" izango litzateke: "Alde horretatik, eskerrak eman behar dizkiegu Ointxe! klubekoei, gazte hauek saskibaloian ondo egiten badute neurri handian Ointxe!-koek egin duten lanagatik delako".